الشجر بيحدف حروف

[فاتحة خيريارب]

حرف الهندسة

افلاطون لما فتح المدرسة
قال البليد فى اى شىء اصلا بليد فى الهندسة
كان فى الدولاب كتاب قديييييييم
سألت جدى فى يوم عليه
قام قال لى اقرا
فسألته تانى !
يعنى ايه الفلسفه ؟!
كان رد جدى ...
الفلسفه
ان جدك يندفن مع جدتك وفى قبر واحد
سرحت حبه
وبدأت اعرف
ان الزوايا فى الشكل المربع تبقى ( قاف )
وقاف جبل مذكور فى قران ربنا
وان سور القبر ويا سور المعتقل فى تماس كبيييييييييييييير
على دايرة كون
وعرفت ان مفيش قانون
يمنع بأن الناس دى كلها
ممكن يكونوا افلاطون
...............................
............................

حرف الانين

افتح معايا سترتى طلع وريد
ايد x ايد
اغزل من النبض اللى طالع م الحشا
عنقود ورود
لوكان بزوقك لو سمحت
اهديه لاشجار الخليل
فوق الحكايا تموت فى صمت
انا فى اعتقادى ان دا يطرح صمود

حرف العلام

بسيط جدا
ما بحبش افلسف كل امورى
لكن
لما بعبر عن مكنونى بيتهمونى ... انى عبيط
جايز
جايزفكرى الاعرج واقف عند حدود الممكن ماتخطاش اللا معقول
او لما بفكر
ممكن اشك فى كل ارائى
وممكن احس بأن الاخر شكله جميل
ويمكن نيتشه .... اليوت
كل اراءهم تحت الظل
..........
بس جمودى فى عالم يأسى ..بيحسسنى
ان خيالى فى منطقه خصب
وان المنطق عند ارسطو
سهل السهل
المضمون فى بساطتى حقيقى
انى ما احبش عالم ( سام )
( والموناليزا ) ابوخ ما اتفرجت عليه
والرسم النافر من عصر النهضة
فى كنيسة سايكستين
اكد لى
ان مايكل انجلوا كان مجنون
ودا علشان رغيف العيش ما بيحبش حاجتين
.................. و ......................

حرف السياسة

اينا .... زيو .... تريا
ماسك حجر
محصور بكم الاسئلة
والروح بتصرخ انقلاب
تغيير فى شكل الجمجمه
نفس الزفير نفس الشهيق
نفس العبث والبرجلة
..........................
اينا ... زيو ... تريا
الدبابة وسرب بارود
طوربيد
قناصة ونار وحصار
كل ده علشان دماغى
اعتذار
ما كنتش اعرف ان انا
ابو الدماغ المعضلة
.......................
اينا ... زيو .... تريا
فتح المزاد
مليار شويه ..... مليون قليل
صندوق حكاوى لسير اوباما
واحنا الاجنده حظنا
عندك رصيد م النووى ممكن نحصرك
عندك قمح ورز ونفط
علق يفط
وافتح فى التلفاز الديجيتال
سمعنى نفس الاغنية
............................
اينا ..... زيو .... تريا
كرر نفس التتر البايخ
حسسنى
ان دماغى فى شكل كانون
إغلى .......... أغلى
لكن
مش مسموح بالثورة العلنى
( لن اعيش فى جلباب ابى )
كامب ديفيد .. شرم الشيخ .. واسلو
وادخل المعبد وفوق راسى الطاقية
.............................
اينا ... زيو .... تريا
وقع الحجر منى

حرفين هزار

( 1 )

خيال المقاته
اللى حدانا فى الدار
فى شقار ونقار
مش عايز يسرح
راسه والف ميت برطوشه
نفصله الدشداشه
............................
احمر ... ابيض ... اسود
وقال ايه
نزينها له بنسر دهبى بالعرض
وقال ليكو عليا عهد
اقف وقفة رجاله
زى ابن ابو سويلم
ولا اخليش ولا عصفوره
تهوب يم الارض

..................................

( 2 )

انا مش حرامى
انا لو بأسرق ما تشوفنيش
انا بشقى وبعرق لجل اما الحق
حبة سكر لقمة عيش
لجل ما اخزن جوا الجب الضلمة دا قوتى
ويمكن موتى
الصيف الجاى


.................................................. .....
اينا .... زيو ...... تريا
معناها 1 - 2 - 3 باللغة اليونانية
وينادى بها فى المزادات

ساعد في نشر والارتقاء بنا عبر مشاركة رأيك في الفيس بوك

[صدى الأحزان]

[فاتحة خيريارب]